@ 
荃灣區3月份防火宣傳及教育活動浪接浪，涵蓋城市與鄉郊，強化社區防火意識，體現「防患未然，守護家園」嘅精神。
1. 清明節防止山火宣傳活動
清明節係孝子賢孫拜祭掃墓嘅日子，荃灣民政處、消防處及荃灣防火會前日（28/3）喺荃灣華人永遠墳場，一同宣傳防止山火嘅信息，沿途派發防火宣傳單張及紀念品，提醒市民同掃墓人士唔好隨意燃燒冥鏹及慎防留下火種。市民亦踴躍支持防火工作，攜手努力，防範未「燃」。
2. 城鄉並重 - 防火應急宣傳活動
荃灣民政處、消防處、荃灣防火會、荃灣區議員及關愛隊，分別於3月7日同3月14日喺珀麗灣舉行火警演習暨防火講座，以及喺環宇海灣舉行防火教育日，透過互動交流環節、攤位遊戲、消防喉轆示範、學習如何使用滅火筒及心肺復甦法等，畀居民學習實用嘅應急及自救技巧，提升大家嘅家居防火意識。
喺鄉郊宣傳方面，老圍村喺3月19日同日發生兩宗火警，其中晚上嘅火警更升為三級。消防處隨即發起「打鐵趁熱」行動，聯同荃灣防火會、關愛隊、荃灣區議員同埋老圍村村民，喺火警翌日到村內宣傳防火信息，向居民派發「防火三寶」，仲幫村民安裝獨立火警偵測器。團隊亦喺3月29日探訪海壩村，舉辦家居防火講座，將安全信息帶入鄉郊。
馬年第一季，政府部門及各界齊心合作，群策群力、馬不停蹄，走訪城鄉 ，為締造安全宜居嘅社區而努力，會繼續多方面宣傳防火信息，發揮「民政幫到你」嘅精神！
@ 