@ 
大埔民政專員陳巧敏9月1日出席大埔鄉郊盃足球賽，為健兒吶喊助威，其後喺公開組總決賽主持開球禮，為全日最緊張刺激嘅賽事揭開序幕。大埔鄉郊盃足球賽眨眼已經嚟到第25屆，今屆創新高有62隊、超過1,300名健兒參賽！各位健兒努力喺場上揮曬汗水，夠晒熱血！
比賽由民政總署同大埔民政處贊助，並由大埔鄉事委員會及七約鄉公所合辦。今屆除咗有長青組、先進組、青進組同公開組四個組別外，仲有大埔民政處、大埔區議會、大埔區青年網絡、大埔鄉事委員會同大埔警區派出嘅代表隊進行友誼賽。每場友誼賽雖然只有20分鐘，但球員腳法精湛，節奏緊湊，而大埔民政處及區議會聯隊同大埔警區嘅比賽更踢成1：1平手，要踢9碼球一決高下，終由大埔警區隊勝出！
賽後，大埔民政助理專員余咏霖擔任主禮嘉賓，並為公開組獲勝隊伍送上獎盃。今年鄉郊盃圓滿結束，繼續傳承友誼第一、比賽第二嘅精神，希望來年見到更多大埔健兒喺綠茵場上嘅英姿。
