@ 
暑假眨眼就完咗啦 ！各位青年有冇善用呢個悠長假期 呢？一班葵青區青年就喺暑假期間，善用餘暇學習新技能，仲為社區出一分力！
葵青區青年發展網絡喺7-8月舉辦咗為期3日嘅「家居維修義工訓練班」 ，由專業師傅 親身教授青年各種實用嘅家居維修技巧，例如唧玻璃膠、更換膠邊 、操作電鑽 、更換電源插頭 、安裝門鎖 同修補瓷磚等 。
完成訓練後，學有所成嘅「小師傅」就為區內獨居長者 提供義務家居維修服務，例如安裝防跌扶手等。佢哋一邊工作，一邊同長者傾偈 ，深入了解並關心佢哋嘅生活狀況。透過呢次活動，青年義工唔只有一技傍身，仲親身體驗到助人為樂 嘅真正意義，提升對葵青區嘅歸屬感！
活動由葵青民政處、葵青區青年發展網絡、葵青區青年發展及公民教育委員會合辦，荃灣葵涌及青衣區中學校長會支持，並由新界青年聯會擔任夥伴機構。
想了解更多葵青區青年活動嘅資訊？記得緊貼葵青區青年發展網絡嘅Facebook (https://www.facebook.com/2021kwtydn ) 同IG (https://www.instagram.com/kwt_ydn/ ) ！
