@ 
灣仔大坑人聲鼎沸，因為又到咗一年一度中秋舞火龍盛事！大坑坊眾福利會喺16/9-18/9 一連三晚舉行火龍盛會，灣仔民政處全力支持。
大坑舞火龍嘅傳統已經有百多年歷史，相傳當時居民同心協力製作火龍，並喺大坑穿梭舞動以驅除疫症。大坑坊眾福利會非常珍重呢項國家級非物質文化遺產，致力將傳統文化承傳至今，今年更培訓約100名小健兒，一齊合力舞動由約1萬顆LED燈點亮嘅小火龍。
16/9係火龍盛會嘅第一日，財政司副司長黃偉綸 Michael Wong聯同多位主禮嘉賓，齊齊到場鼎力支持。喺安庶庇街舉行起龍儀式之後，火龍隨即穿梭大坑大街小巷，除咗浣紗街之外，今年更加將火龍表演延伸去銅鑼灣道，大火龍同小火龍兩龍相遇，將氣氛推至最高點！
灣仔民政處會繼續同大坑坊眾福利會一齊努力，將大坑火龍文化傳遞畀更多人，讓呢項傳統繼續發光發亮，令呢項傳統一直傳承落去。
