@ 
國慶將至 ，一齊睇吓深水埗呢幾日有咩節慶活動啦 。
1.海濱新景點之維港臨海市集
「躍動全港 ． 一切由「深」出發」系列慶祝活動正進行得如火如荼 。
長沙灣海濱自去年啟用後，成為咗欣賞維港嘅新景點，中秋當晚就吸引咗有三、四千人嚟過節。9月21日更舉辦咗「假日維港臨海體驗市集」 ，將國慶氣氛推向高峰 。
海濱市集設置多個特色攤位，包括拳擊體驗 、即場Henna紋身同Zentangle手繪 、品嘗白蘭花有汽茶同多個手作攤位等。香港基督教服務處石硤尾幼稚園嘅小朋友更穿上特色華服，同市民分享喜悅 。
一眾嘉賓亦去咗海濱碼頭欣賞已經錄得超過30000人次互動嘅「心動．感恩」巨型打卡愛心裝置 一齊打卡 ，寓意對祖國繁榮發展由心出發嘅滿滿祝福 。
巨型打卡愛心裝置將會擺放至15/10，大家趁嚟緊國慶假期過嚟打卡啦 ！喺南昌站長沙灣海濱碼頭吹住海風 ，感受滿滿節慶氣氛，同賀國慶！
活動由深水埗居民聯會主辦，深水埗民政處、深水埗區議會及深水埗中南分區委員會協辦。民政及青年事務局 Home and Youth Affairs Bureau副局長梁宏正、中聯辦九龍工作部副部長李文彬、深水埗民政專員黃昕然、立法會議員鄭泳舜、梁文廣、陳凱欣﹑深水埗居民聯會理事長陳偉明、深水埗中南分區委員會主席黃永威均有出席支持。
2.深水埗節日燈飾亮燈典禮
2024至2025年度深水埗節日燈飾亮燈典禮 日前（20/9）亦順利舉行 。
當日一眾嘉賓主持亮燈儀式，長沙灣政府合署對面五光十色嘅霓虹燈隨即亮起 ，其他地點同樣亦有閃閃 燈飾照亮深水埗 。
除咗有古箏表演 、兒童拉丁舞 、仲有兒童合唱團 、街舞表演 ，席間大家仲揮動國旗、區旗，洋溢歡樂氣氛 。
活動由深水埗節日燈飾籌備委員會主辦；深水埗民政專員黃昕然、中聯辦九龍工作部處長歐陽瑋、深水埗警區副指揮官高振邦、中華電力企業事務（對外關係）總監羅國有、燈飾委員會大會顧問、三會主席及副主席等均有出席支持。
