@ 
由九龍西潮人慈善基金主辦、九龍城民政處贊助嘅賀國慶「潮玩夜市 Chill Night Market 2.0」一連兩日（12 -13/10）喺九龍城賈炳達道公園順利舉行！
啟動禮喺日前（12/10）舉行，一眾主禮嘉賓，包括中聯辦九龍工作部副部長李文彬、政務司副司長卓永興 WH Cheuk、政制及內地事務局局長曾國衞、香港警務處處長蕭澤頤、民政總署署長張趙凱渝、油尖旺民政專員余健強、深水埗民政專員黃昕然及署理九龍城民政專員胡皓文等出席。立法會議員李慧琼、梁文廣、陳凱欣、楊永杰同梁毓偉等都有出席支持。現場更有非遺 英歌演出，共慶祖國成立75周年，場面非常熱鬧！
今年「潮玩夜市2.0」特別加入咗九龍城寨嘅元素，一眾嘉賓喺場內多個城寨主題嘅背景板打卡留念，仲試食咗豬肉條、紅桃粿、油柑子等多款潮汕特色美食，大飽眼福同口福！市集更設有多個文化體驗攤檔，畀市民即場體驗潮樂、鐵枝木偶及潮人潮語燈謎等。
政務司副司長卓永興致辭時表示，九龍城係一個蘊含豐富歷史同文化嘅獨特社區，寄語紮根九龍城多年嘅潮州人，繼續積極推動中華傳統及潮州文化嘅傳承同發展。佢同時希望今次活動可以吸引年輕人以及多元族群參與，更深入了解中華文化嘅精粹，促進社會共融，大家齊齊感受九龍城區嘅魅力，體驗「香港無處不旅遊」嘅樂趣。
@