大灣區創科考察團 @ 建「機」灣仔 －青少年社區設施優化計劃

考察團先到訪XbotPark機器人產業基地，了解機器人同三維打印嘅最新技術及應用。同學仔更有機會親身遙控機器人，體驗機器人科技嘅樂趣。之後就到中國散裂中子源科學中心，認識國家首台脈衝型散裂中子源裝置嘅運作。裝置用於探索物質材料微觀結構，喺物理、材料科學、資源環境等研究領域廣泛應用。透過參觀基地嘅科普項目，學生了解到國家喺新能源及生命科學等方面嘅發展。考察團最後到訪松山湖材料實驗室，學習將基礎研究轉化成應用技術嘅過程，了解如何以創新意念促進社區發展。

透過大灣區考察，同學都體會到國家嘅創科發展一日千里，大開眼界！我哋期望可以帶更多學生到內地其他城市交流，畀佢哋進一步了解國家嘅最新發展同機遇，將學習到嘅知識轉化成意念，建設更美好嘅社區。

灣仔民政處今年聯同機電工程署合辦咗建「機」灣仔 － 青少年社區設施優化計劃，創科考察團係計劃嘅一部分。建「機」灣仔共有170名來自12間中學嘅學生參與。我哋希望透過多元化嘅創科學習活動包括STEAM（科學、科技、工程、藝術和數學）設計思維工作坊，提升學生對機電安全、節能減碳及創新科技嘅認識，同時透過喺灣仔區嘅社區考察，推動學生參與社區建設，運用科技優化市民日常生活，從而加強學生嘅公民意識，為區內帶來創新社區設施意念。