@ 
全港首個排檔商販聯同大廈居民一齊參與嘅大型防火演習，昨日（7/11）喺深水埗順利完成，希望可以提高居民商販嘅防火意識同防災應變能力！
第一環節：聯合走火演習
所有參與嘅排檔商販同附近大廈居民井然有序咁沿行人路疏散到集合點，過程順利又快速！大家都學識咗點樣冷靜應對緊急情況，安全迅速咁離開。期間，深水埗關愛隊(南昌東、南昌南、南昌西、南昌北同南昌中)又幫手照顧居民，同檔主睇住檔口。
第二環節：消防車升雲梯救人演習
消防車升雲梯上大廈天台救人演習，見識到消防員平日嘅專業訓練，令大家對消防救援有更深入了解 。 消防處同事仲同大家講解消防車雲梯嘅冷知識。
第三環節：救火演習
消防員透過模擬拉乾喉同進行火演習，展示模擬嘅火場救援過程。最後，大會仲派發滅火氈畀參與嘅排檔同居民，提醒大家防患未「燃」。
深水埗民政專員黃昕然亦出席咗活動，佢提到防火委員會嘅工作係「潤物無聲」，不斷以細緻嘅教育工作，提升安全意識，保障居民嘅生命財產。呢次演習加強社區跨界防火宣傳合作，畀更多市民學識逃生方法同緊急情況嘅應對措施，等居民可以住得安心、商販工作稱心。
活動由深水埗民政處、香港消防處、深水埗區防火委員會合辦。消防處九龍西消防區長江偉忠、署理深水埗區環境衞生總監張永楷、深水埗防火委員會主席吳騰等都有到場支持。大會特別多謝鴨寮街販商協會、深水埗左鄰右里關愛社、深水埗關愛隊、香港交通安全隊同社區應急輔助隊等團體嘅義工熱心協助。
@ 