@ 
中國人民解放軍海軍「三一」艦編隊上星期訪港。「三一」艦編隊嘅「海南艦」同「長沙艦」喺中國海軍中擔當着至關重要嘅角色。「海南艦」係國家第一艘兩棲攻擊艦，配備陸海空三種兵力，同時有導彈、艦砲等火力系統，仲可以裝載直升機、氣墊艇同坦克裝甲車。「長沙艦」係國家自主研製嘅導彈驅逐艦，呢個型號嘅驅逐艦被譽為航母編隊嘅「帶刀護衛」、「中華神盾」！
今年係中華人民共和國成立75周年，「三一」艦編隊喺國慶75周年訪港，別具意義，更體現國家對香港特區嘅關愛同支持。香港市民可藉此機會親身體驗同了解國家多年來喺國防同軍隊現代化建設取得嘅重大成就，以及中國人民解放軍嘅風采面貌。
藉着難得嘅機會，南區民政專員兼南區區議會主席鄭港涌、南區區議員、南區地區「三會」成員，喺剛過去嘅周末分別到西環招商局碼頭同昂船洲海軍基地參觀兩艘艦隻，親身感受到國家國防同軍隊建設發展嘅偉大成就。專員、區議員同「三會」成員都感到無比光榮同興奮。參觀期間，大家更與海軍官兵交流，深刻感受到國家海軍「威武文明之師」嘅使命感與責任感，加強咗大家嘅民族自豪感同對國家嘅擁戴。
今次登艦參觀亦有助一班快將參加「國家安全教育地區導師培訓計劃」嘅南區地區領袖更了解維護國家安全嘅重要性。大家都表示，未來將以導師角色積極喺地區傳揚國家安全信息，提升全民自覺維護國家安全意識！
@ 
@