@ 
灣仔都有得坐高鐵？原來係由民政總署贊助、香港五邑總會舉辦嘅「Chill青新家鄉體驗之模擬灣區號」，早前將高鐵「搬」咗入灣仔護老院舍，為一班老友記帶來一場模擬高鐵旅程！為咗令體驗更逼真，義工先將院舍布置為高鐵車廂，再為每位「乘客」準備軟餐飯盒，希望為有吞嚥困難嘅長者增添進食嘅樂趣。
灣仔區議員兼軒尼詩關愛隊隊長劉珮珊聯同隊員兼香港五邑總會副理事長蘇穎瑜，以及灣仔民政處代表同一眾青年義工更化身為乘務員，陪伴大家登上「灣區號」遊歷五邑。
正所謂「食得是福」，嘉賓同義工為老友記送上豐富嘅五邑家鄉軟餐飯盒，包括有開平手工石磨腸粉、新會陳皮豆沙湯圓同香港點心燒賣蝦餃，全部都係大家熟悉又喜愛嘅傳統美食。
列車之旅當然唔少得欣賞靚景，一班青年義工喺「灣區號」旅程中分別向老友記介紹咗五邑：新會、開平、鶴山、台山同恩平嘅風景同當地特色，仲用即影即有為老友記影靚相，希望以呢場創新嘅「高鐵之旅」為院舍注入活力，為老友記留低美好回憶。
見到一班老友記燦爛嘅笑容，除咗喚起佢哋對社會嘅關愛同責任感，亦希望更多人認識長者吞嚥困難嘅問題，將來有更多種類豐富嘅軟餐食品，畀長者食得開心、享受。
灣仔民政處會繼續同各方緊密合作，安排更多貼心嘅社區關愛活動，共建溫馨美好嘅灣仔。
