@ 
深duck隆重為大家介紹，首個以咖啡為主題嘅「十八區日夜都繽紛」節目 ，就係一連兩日 （14 -15/12）喺深水埗楓樹街舉行嘅「約定咖啡 Only. Coffee Festival」！
呢次咖啡節配合區內文青空間嘅發展，推動區內嘅文創氛圍 ，同時振興地區經濟。
活動內容豐富，大家可以行吓場內嘅咖啡攤位 、觀賞咖啡拉花比賽、去廉署大杯咖啡杯影相打卡同喺「喜」動圖書館睇吓書。
作為青年節活動之一，一批好客之「導」年輕導賞員亦在場介紹「咖啡五感體驗」嘅遊戲，帶市民遊歷深水埗區特色景點。青年好客大使以親切有禮嘅笑容向市民講解區內歷史，分享特色美食佳餚，令參加者感到賓至如歸，宏揚「好客之道」。
參加者仲可以獲得有我個得意樣嘅duck duck coin，憑金幣喺區內指定嘅cafe以優惠價選購產品，而銀幣就可換領一杯咖啡慢慢嘆，度過一個寫意嘅週末。
同場亦有文青市集，大量文青精品可供選購，啱晒唔飲咖啡但又想嚟嘆吓嘅大小朋友。
活動由深水埗民政處、深水埗區議會及深青社聯合舉辦，多位嘉賓亦出席開幕典禮，當中包括深水埗民政專員黃昕然、中聯辦九龍工作部處長歐陽瑋、立法會議員鄭泳舜、林振昇、梁文廣及多位深水埗區議員。深水埗民政處將繼續舉辦及支持不同社區活動，齊齊振興地區經濟。
