@ 
歲晚將至，南區關愛隊今年再次與南區區議會合作，展開「關愛大行動迎新歲」，將更多關愛傳揚出去。
今次嘅大行動除咗有超級積極嘅關愛隊同區議員外，仲有香港電燈義工隊熱心參與，可以話係集合咗「政、商、民」三方嘅力量，共同為社區送上關懷。今次嘅目標係喺農曆新年前探訪超過2000戶長者及弱勢社群家庭，以及為200戶提供簡單家居清潔、維修服務。
12月18日喺鴨脷洲邨露天廣場舉辦啟動禮，邀請咗一眾嘉賓，包括中聯辦港島工作部宣教處副處長黃鵬舉、全國人大代表朱立威、政協委員周厚立，以及南區民政專員、南區區議會主席暨南區關愛隊總指揮Francis。
啟動儀式結束後，南區17隊關愛隊同埋區議員隨即馬不停蹄，迅速出動進行家訪，並送上愛心禮物包，為新春增添喜慶。
南區關愛隊同南區區議會一向係好拍檔，嚟緊喺新一年會持續連同地區持分者、凝聚社區資源、關心服務市民，唔會令大家失望。
