@ 
踏入節日氣氛濃厚嘅冬日 ， 荃灣區內各大主要天橋及道路都布置咗璀璨奪目嘅燈飾，更有以今年爆紅嘅熊貓 做主題嘅燈飾，亮點項目包括：
荃灣公園中央廣場4隻Q版熊貓 各有唔同姿勢，配合閃閃生輝嘅金色聖誕樹 ，適合一家大細齊齊打卡！
荃灣沙咀道遊樂場同荃灣裁判法院之間馬路中央分隔布置嘅漫天飛雪燈幕 ，顏色隨時間漸漸變化 ，同旁邊大河道天橋上嘅燈飾互相輝映！
西樓角花園嘅發光拱門，令行人彷彿走進時光隧道 ，同場加映「#ddHK 設計 #香港地」嘅藝術裝置「荃朋有你」，可愛嘅卡通人物同粉紅燈飾相映成趣 。
除咗上述介紹嘅亮點，市民仲可以喺海濱長廊同荃豐中心行人天橋等地點見到色彩斑斕嘅燈飾，感受節日氣氛 ，鍾意影相 嘅你千祈咪錯過 !
要喺荃灣歡度佳節，一定唔可以錯過一年一度嘅除夕倒數活動「荃城匯聚•喜迎2025」。12月31日晚上9:00，約定你 喺沙咀道遊樂場見 ! 詳情請參閱附圖活動海報。
