@ 
Hello 大家好，又係我深duck記者同大家報道喇！
Running Pet 嘉年華上星期日（29/12）喺饒宗頤文化館順利進行並圓滿結束 。為響應「第十五屆全國運動會」 ，我深Duck仔同一眾「主子」嗱嗱臨跑到深水埗參加節目豐富嘅嘉年華 。唔想跑嘅，都可以乘搭大會安排嘅主人寵物共融巴士㗎。
參加者除咗挑戰人寵定向運動 、毛孩障礙挑戰賽 、體驗Doga毛孩瑜伽 ，仲欣賞埋四大紀律部隊工作犬表演 、寵寵躍動舞蹈 同埋龜兔賽跑添 。當日有好多保護動物團體參與，一齊宣揚人寵共融 信息。現場仲見到大人小朋友一齊研究爬蟲動物 同購買寵物精品 ，打卡影靚相。大家都度過咗一個愉快嘅週末，準備一齊迎接 2025！
活動由深水埗民政處及饒宗頤文化館合辦。民政總署署長張趙凱渝、深水埗民政專員黃昕然、饒宗頤文化館總幹事李高凱盈及深水埗區議會提振地區經濟專責工作小組主席黃俊雄亦出席支持活動 。
以上由深Duck記者報道，期待下次再為大家分享更多深水埗區資訊 ！
