@ 
呼應《行政長官2024年施政報告》、《香港旅遊業發展藍圖2.0》，南區區議會聯同南區民政處及地區團體繼續喺區內增設熊貓特色打卡點，喺度速報一吓 ！
之前介紹過嘅熊貓聖誕燈飾、立體熊貓地畫、「冬日熊貓走廊」、幻彩互動天幕、熊貓小巴、彩色熊貓拼畫避雨亭、熊貓艇仔粉同埋各款熊貓特色造型小食等，都收到熱烈迴響，唔少市民都話想見到更多熊貓布置。見大家咁支持，南區區議會最近增設以下打卡點，將氣氛進一步推至高潮！
南區嘅「繽紛熊貓節日巡禮」—農曆新年版就快開始喇！精緻嘅聖誕樹下星期開始就會換成璀璨嘅霓虹年花、金元寶等，再配合埋圓碌碌嘅大熊貓燈飾，到時再喺赤柱海濱、香港仔海濱公園、黃竹坑大皇爺廟外，以及鴨脷洲風之塔公園同大家拜年。
咦？點解啲街道牌變咗彩色嘅？原來南區特選嘅16條街道嘅街道牌已經以熊貓主題作各式各樣嘅布置。唔講唔知，南區有條「成都道」，加埋熊貓裝飾就啱晒！
另一邊廂，港鐵公司都全心投入熊貓熱，安排咗多架熊貓主題列車服務南港島綫 ，列車上仲有造型百變、一家大細嘅熊貓。海洋公園站亦化身成熊貓無處不在嘅主題車站，乘客都笑住影相，好開心啊！
除咗固有嘅地區團體、海洋公園同旅發局一直大力支持南區處處有熊貓系列活動，多個團體同機構包括港鐵、太白海鮮舫等亦表示合作意願，共同將區內特色同熊貓元素結合，再配以獨特活動推動熊貓熱潮。康文署都喺區內公園擺放咗熊貓藝術裝置，增添氣氛
區議會會議上亦有提及，南區民政處同南區青建委為響應「南區處處有熊貓」系列活動，正增設多個結合咗本區文化、旅遊同熊貓元素嘅打卡地標。無論係沙灣石灘小徑上特意設計嘅「港式熊貓」壁畫、赤柱廣場小巴站上蓋嘅「赤柱水上運動x熊貓」新設計，抑或係同路政署合作喺香港仔大道行人天橋增添嘅特色熊貓圖案等，都充滿南區特色，夠晒獨特。
