@ 
18區日夜都繽紛繼續繽紛！極受觀塘區街坊歡迎嘅「龍騰觀塘新春夜市2025」返嚟啦 。由17/1至9/2，大家可以嚟到觀塘市中心自由空間（鄰近裕民坊），再一次體驗新春食、買、玩嘅歡樂氣氛。夜市活動由香港觀塘工商業聯合會、觀塘民政處同觀塘區議會合辦。
星期六（18/1）傍晚，商務及經濟發展局 CEDB局長丘應樺、中聯辦九龍工作部副部長賴建華、觀塘工商業聯合會永遠榮譽會長楊孫西、全國人大代表陳振彬、觀塘民政專員兼觀塘區議會主席何立基、香港觀塘工商業聯合會會長林天意、立法會議員鄧家彪及顏汶羽及市區重建局執行董事（商務）區俊豪一齊出席咗開幕典禮 ，為一連24日嘅跨年夜市揭開序幕 。
今次嘅夜市共有近30個飲食類及非飲食類嘅攤位，飲食攤位有各類型嘅香港街頭小食同家鄉食品 ，非飲食類攤位就設有兒童遊戲區 及花卉 。另外，夜市亦設有以熊貓為主題嘅打卡區 ，再配合埋市區重建局喺現場附近嗰80隻可愛熊貓裝置 ，有得食、有得玩又有得影，啱哂一家大細嚟歡度春節，大年初一、二、三照常啟市 ，務求令大家盡興而歸 ！
觀塘區議會一眾議員 仲喺夜市現場親自擺檔，派發紀念品之餘仲會同各位觀塘街坊傾吓偈，並化身成為書法家幫大家寫揮春 添。
而喺同一時間，觀塘區亦有另外一個傳統市集 。食環署嘅觀塘年宵市場將於年廿四（23/1）起至年廿九晚（28/1）喺翠屏道觀塘遊樂場舉行。場入面有84個乾濕貨攤檔同5個小食檔。大家喺花市買完嘢，仲有機會抽獎添 。花市亦裝飾咗好多熊貓燈飾同許願牆 ，讓大家可以打卡同寫心願 。
