@ 
荃灣民政處聯同荃灣區青年發展及公民教育委員會（荃青會）喺過去一年，舉辦咗唔少推動區內青年發展及公民教育嘅活動，希望鼓勵一眾青少年朋友積極參與社區服務 ，並提升佢地嘅德育修養與公民意識。
「荃灣區活動傑出青少年義工嘉許計劃」
今年繼續舉辦咗「荃灣區活動傑出青少年義工嘉許計劃」 ，目的係表揚喺2023年10月至2024年9月積極參與義工服務並有傑出表現嘅青少年義工，感謝佢哋係義工服務中付出嘅愛心、努力同時間 。
有關計劃設有小學組、中學組及公開組，共收到101個義工提名 ，並喺2024年11月進行咗評審面試，根據表現最出色嘅義工，選出「傑出義工」及「優秀義工」，所有被區內青少年服務機構或者學校提名嘅義工都可以獲得嘉許狀，而傑出義工同優秀義工仲會分別獲贈書券作為獎勵 。
「好客之道」標語創作比賽
為響應政府推動嘅「好客之道」運動，我哋早前亦舉辦咗「好客之道」標語創作比賽，目的係畀青少年思考待人以禮及樂於助人等傳統美德嘅重要性 ，以推廣公民教育。
比賽設有小學組、中學組及公開組，每組各設冠、亞、季軍及三個優異獎，合共收到1,391份作品 。評審工作已於2024年12月完成，得獎者均可獲得獎狀同書券以示嘉許 。
兩個活動嘅獎項已經係2024年12月21日舉辦嘅「荃灣區青年藝墟 x 運動電競嘉年華」上頒發 。感謝 區內各青少年服務機構同學校，一直為荃灣區培育咗唔少熱心嘅青少年義工，並積極推動青少年參與社區活動；亦想勉勵咁多位義工計劃及標語比賽嘅參加者，希望大家繼續支持民政處及荃青會嘅活動，並保持服務他人嘅愛心 ，感染更多人一齊貢獻社會！
