金蛇起舞迎新歲 璀燦燈飾耀北區

為慶祝蛇年新春，北區民政處喺區內人流暢旺嘅地點，包括上水同粉嶺兩個港鐵站嘅行人天橋、北區大會堂、新運路同沙頭角公路迴旋處、粉嶺遊樂場，仲有上水新康街，布置咗設計新穎嘅賀年燈飾，為北區注入歡樂嘅節日氣氛！

今年嘅燈飾布置加入咗唔同嘅節慶元素，例如大家喺北區大會堂可以睇到閃動嘅煙花，夜夜璀璨；喺上水新康街就會見到唔同嘅賀年圖案同埋一對可愛嘅蛇仔盤旋夜空；粉嶺天橋有喜氣洋洋嘅舞龍舞獅；粉嶺遊樂場就有翩翩起舞嘅發光金蛇，大家喺北區隨處都可以感受到新年嘅喜悅同盡情打卡啦！