@ 
農曆新年就快到喇，大家係咪開始忙緊辦年貨同洗邋遢呢?
南區民政處、南區區議會日前（21/1）聯同食環署喺香港仔街市舉行咗「歲晚清潔大行動暨防鼠宣傳活動」，呼籲街坊同商販多關注街道及街市清潔，防治鼠患。
各位區議員喺現場了解咗食環署現時各種控鼠裝置，以及區內嘅防鼠策略，並鼓勵街坊同商販同心協力，杜絕鼠患。
一眾議員除咗落力宣傳同埋幫手清潔街道外，亦派發賀年揮春畀街坊，同大家拜個早年，齊齊喜迎蛇年，共建潔淨南區。
新春將至，祝大家蛇年金蛇騰達，身體健康，心想事成！
大掃除完繼續身體力行，用環保方式賀年
由賽馬會贊助，海洋公園主辦同潔淨水域行動（CWI) 協辦嘅「拾塑行動教育計劃」日前（25/1）喺香港仔海濱舉行啟動禮同埋「大塑除」嘉年華。署理南區民政專員Samantha、海洋公園行政總裁Ivan 、賽馬會慈善事務副總經理Arnold連同一眾主禮嘉賓到場為呢個寓教於樂嘅環保教育計劃揭開序幕！
現場有各種具教育元素嘅攤位小遊戲、海洋藝術品展示、升級再造工作坊等，仲有同學仔自己曬嘅紫菜乾畀大家試食。大人、小朋友邊玩邊了解塑膠污染對環境嘅影響，仲可以學到走塑嘅實用小貼士 ，玩得十分盡興！活動仲有清理避風塘嘅環節，架船係全港第一隻太陽能零排放海洋垃圾收集船，由CWI自行設計。
希望今次行動鼓勵大家一齊身體力行，喺日常生活中「大塑除」，為海洋保育出一分力，邁向可持續發展嘅生活模式！
