@ 
安居樂業係每個人嘅心願。為推動大廈管理同埋提升業主對相關領域嘅認識，大埔民政處同區內各界近期舉辦同參與咗以下項目：
1. 大埔區大廈管理證書課程
大埔民政處主辦，新界社團聯會大埔地區委員會同大埔區業主立案法團協辦，共3堂大廈管理證書課程。頭兩堂（2月10日同17日）吸引咗約150位學員參加。課程由不同政府部門提供資訊，一眾業主不但把握機會提問，更自發積極交流意見，共同為大廈管理出一分力！
2. 積極參與發展局舉辦的《建築物條例》修例諮詢會
為收集對修訂《建築物條例》嘅意見，發展局舉辦咗幾場諮詢會以了解公眾睇法。2月6日，近十位大埔區議員同區內法團成員積極參與。除咗就條例發表意見，亦同時加深自身對大廈管理嘅認識，幫手講資訊帶返入社區！
3. 大廈管理專業顧問服務計劃（BMPASS）
呢個計劃透過地區團體夥拍物業管理公司，為區內「三無」大廈成立法團提供專業意見同支援，仲會喺成立法團之後繼續協助居民運作，等大家可以為居所創造更安心嘅環境。
團隊自2024年7月開始為大埔區提供服務，至今已經成功協助區內3幢大廈召開成立法團嘅會議。
4. 大埔墟小區關愛隊同業主交流提供意見
有街坊決定自行成立法團，但苦於缺乏合適嘅場地嚟舉行會議。大埔墟小區關愛隊收到求助後立即協助安排場地，而身兼區議員嘅隊長溫官球亦向業主提供意見，最後會議喺2024年12月順利召開，更成功成立法團。
