@ 
「高音甜、中音準、低音勁」！搵影音器材梗係要嚟深水埗鴨寮街啦！
等我深DUCK為大家介紹吓！啱啱過去嘅週末（1-2/3）喺鴨寮街舉行咗有「聲」有「影」嘅聲影「寮」天室，滿足各位發燒友所需。
「聲」方面，現場有黑膠碟試聽、又有不同音響器材，務求帶畀大家截然不同嘅聽覺享受；仲有年輕buskers演繹多首流行曲同接受街坊點唱添！深Duck都忍唔住要唱句：是誰在敲打我窗？
「影」方面，除咗有「360。自拍」新玩意，亦有懷舊打卡位；「攝影教室」專業攝影師仲分享影沙龍嘅竅門，咁大家就可以捕捉更多深水埗靚景，吸引遊客嚟遊覽打卡，探索深水埗嘅活力啦！
當然唔少得嘅仲有攤位遊戲同新舊交融嘅飛機欖、糖蔥餅、發光棉花糖等小食，場面熱鬧繽紛！
近年捲起懷舊風，CCD相機同黑膠唱片成為潮流新寵，唔少遊客都嚟深水埗尋寶。深DUCK都聽到唔少參加者問大會啲攝影器材、唱片同擺設喺邊度買，相信有助提振地區經濟。
呢次「日夜都繽紛」活動嘅主禮嘉賓包括民政及青年事務局 Home and Youth Affairs Bureau副局長梁宏正、深水埗民政專員黃昕然、立法會議員鄭永舜、梁文廣、深水埗居民聯會理事長陳偉明、深水埗區議會提振地區經濟專責工作小組主席黃俊雄、深水埗左鄰右里關愛社會務顧問劉佩玉、青年議會主席張瑞祺、活動召集人兼深水埗中南分區委員會主席黃永威、鴨寮街販商協會會長秦文荃及支持機構技術總監劉永勳。
