@ 
清明節就快到，好多孝子慈孫都會去掃墓。近期天氣比較乾燥，火災危險指數升高，22/3屯門區防火委員會委員，聯同社區應急先鋒、消防處及民政處同事一齊喺屯門區內各處主要掃墓地點進行「清明節前夕防止山火」宣傳活動，提高市民防止山火嘅意識，減少山火發生。
除咗有宣傳車巡迴區內播放防止山火嘅信息外，大家仲喺掃管笏、青山灣漁民墳場及青磚圍一帶向街坊派發防止山火宣傳單張同紀念品。防火委員會仲喺區內懸掛宣傳橫額，以及向居民及鄉事組織寄發呼籲信，加強宣傳防止山火信息。
大家前往掃墓時，記緊唔好留低火種，一齊努力，減少山火發生，仲可以保護香港嘅自然環境。
