@ 
春暖 花開 ，又係遊園賞花嘅好時候 ！荃灣區多隊關愛隊日前(18/3)帶領一眾街坊參觀維園香港花卉展覽 ，共同參與城中一年一度嘅盛事。荃灣民政專員區家盛同多位荃灣區議員亦有參加，與眾同樂。今年花展以「綻放英姿」為主題，主題花「秋英」象徵堅強同幸福，滿園繁花似錦 ，賞心悅目，一眾參加者同荃灣街坊都流連忘返，忍唔住留低倩影 。
今年花卉展嘅東方園圃比賽冠軍就由荃灣區「江南宅第」獲得 ！作品由康文署荃灣區康樂事務辦事處悉心設計，採用咗山石同水景等自然元素 ，仲用埋石橋、石雕、石枱同拱門作點綴，同園林景觀相輔相成。庭園布局參照陰陽有致嘅法則，以圖吉利，祈願人人富貴長壽。園圃內遍植各種花木，色調相配，呈現大自然嘅和諧美感。
現場所見，唔少荃灣街坊同其他參觀者都有同奪冠作品「江南宅弟」園圃「打卡」。今年香港花卉展覽完結後，呢個作品就會移師到荃灣城門谷公園畀市民繼續觀賞，配合城門谷公園內嘅自然風光同人文氣息，一定會別有一番特色，亦肯定會為荃灣增添一個打卡位！
荃灣區關愛隊一直為居民舉辦多元化嘅服務同活動，致力提升社區嘅凝聚力 ，我哋會將呢份關愛帶畀荃灣區嘅居民，為社區注入滿滿嘅正能量 ！
#
@