@ 
北區有唔少行人隧道，佢哋嘅設計都比較平實。路政署最近就喺各區揀咗一系列使用率高嘅行人隧道同天橋做美化工程，北區都有兩條行人隧道被揀中做美化。
第1條行人隧道喺上水馬會道，北區民政處藉住呢個機會，與路政署同北區青年發展及公民教育委員會合辦美化隧道繪畫比賽，畀區內嘅同學參與美化自己社區。比賽以「𣈱遊北區樂悠遊」為主題，分咗中學組同小學組，每組頭3名作品都會印喺隧道入面畀途人欣賞。得獎作品寫實風有，動漫風又有，除咗展現出年輕人嘅創意，為社區增添色彩同活力，仲提醒埋大家，其實北區都有好多獨一無二嘅地標㗎！
第2條行人隧道就喺粉嶺聯和墟聯興街，正正喺北區歷史建築之一聯和市場隔離。民政處同路政署合作，將隧道變身成為「時光隧道」，將北區唔同景色同地標嘅今昔相片印喺隧道兩側。北區近年嘅發展加快咗唔少，未來嘅發展速度就只會更加快，呢條時光隧道除咗可以畀街坊緬懷一吓舊時嘅北區，亦可以吸引市民去睇吓呢啲地標今日嘅樣貌。美化工程預計會喺4月完成，到時就可以同大家見面喇！
