@ 
4月15日就係第10個「全民國家安全教育日」喇！為大力推動同支持國安教育，中西區民政處聯同警務處、中西區區議會、中西區撲滅罪行委員會以及中西區各界協會，喺中區警署外牆懸掛全港最大嘅「全民國家安全教育日」橫額！
為配合全國性主題「全民國家安全教育 走深走實十周年」，中西區內政、商、民通力合作，攜手推動國安教育。除咗中區警署外牆嘅大型宣傳橫幅外，大家途經區內商場時，亦不妨留意下其他由中西區民政處、中西區區議會同區內機構合作懸掛嘅宣傳橫額。
另外，中西區民政處將會喺4月13日同埋全民國家安全教育日4月15日分別舉行「全民國家安全教育日親子嘉年華」同「中西區全民國家安全教育日研討會」，以唔同形式令市民大眾了解國家安全嘅重要性，盡公民義務合力維護國家安全。
「全民國家安全教育日」橫幅將會懸掛至6月初，歡迎各位市民一齊嚟打卡，感受中西區內愛國愛港嘅氣氛。
