@ 
尋日(9/4)深DUCK嘅朋友仔 — 國寶熊貓嚟咗深水埗！
深水埗民政專員黃昕然同香港四川社團總會監事長李聖根，去咗竹園區神召會南昌康樂幼兒學校及樂善堂董清波幼稚園派熊貓公仔，畀小朋友認識熊貓嘅習性。
小朋友答問題好叻叻，知道熊貓來自中國四川同食竹葉。佢哋仲好有禮貌，從嘉賓手上接到熊貓公仔就即刻講多謝，仲攬實影相，場景超有愛。有小朋友好雀躍咁話，復活節同暑假要帶埋熊貓公仔去海洋公園探家姐同細佬啊！熊貓性格溫馴可愛，同小朋友一樣咁活潑得意。
原來18區中，深水埗居民中0-14歲小朋友同年青人比例排第二高，所以未來地區工作嘅重點都應該同親子、成長同青年相關。
報導完熊貓，我深DUCK繼續為大家介紹深水埗最新嘅打卡熱點。
登登登登…喺荔枝角公園有「泰國櫻花」之稱嘅「花旗木」現正盛開。除咗比起櫻花大，仲帶有淡淡香味，花期長達1個月，大家可以睇吓相。復活節長假唔使坐飛機，留喺香港一樣都可以欣賞到咁靚嘅花喇！
