@ 
由九龍城民政處、九龍城區議會、利哲宏博士議員辦事處、左滙雄議員辦事處、林博議員辦事處、少數族裔愛樂共融協會、潤愛同行、All for HK同保良局林文燦英文小學合辦嘅「2025 九龍城盃」，5/5喺土瓜灣遊樂場圓滿舉行！
活動匯聚咗華裔同少數族裔嘅朋友，組成10隊足球隊，透過比賽促進社區共融。當日早上9點半開始，佢哋已經大展球技。 賽事中場休息期間仲有非洲鼓表演為各隊打氣。 比賽精彩絕倫，總決賽更加係戲劇性十足。雙方雖然一度拉開距離，但臨完場嘅時候竟然追平，要靠十二碼大戰分出勝負。現場街坊睇到拍爛手掌，更為健兒喺球場上嘅精彩發揮打氣！
正所謂「比賽第二，友誼第一」！喺頒獎儀式上，九龍城民政專員蔣志豪同利哲宏議員勉勵大家繼續為社區共融出一分力，透過體育同文化等交流方式，建設包容、多元、和諧嘅九龍城社區，為呢區注入新活力。適逢東江水供港60周年，蔣專員亦寄語一眾健兒要將團結、不屈不撓同為他人奉獻嘅精神融入日常生活，繼續為社區貢獻。
同樣緊張刺激嘅仲有喺同日舉行嘅港超聯九龍城對東方嘅賽事。個半鐘嘅比賽雙方互有攻守，戰況激烈 。專員亦到場支持喺上季升班嘅九龍城足球會，鼓勵佢哋越戰越勇，遇強越強。九龍城民政處會繼續透過推展多元化嘅體育活動，建設更有活力嘅社區。
@