九龍城區喺母親節當日(11/5)舉行咗一場別具意義嘅電影放映會。一眾偉大嘅媽媽同屋企人一齊喺啟德Airside MCL 戲院,觀賞內地同香港都廣受好評嘅電影《水餃皇后》。活動由香港愛馬女士協會同妍麗會主辦,九龍城民政處全力支持。
活動特別邀請到立法會議員楊永杰、九龍城區區議員林博,同埋九龍城民政助理專員胡皓文等嘉賓到場支持。主辦單位希望透過呢部溫馨勵志嘅電影,宣揚臧姑娘堅毅嘅母愛同創業精神。 觀眾都大讚電影寫實,打動人心,引起共鳴,好多人都喊濕幾包紙巾。
主辦單位更為觀眾準備咗母親節「彩蛋」— 電影角色原型人物,臧姑娘嘅兩位千金Joanne同Jessica驚喜現身,親臨現場謝票,亦同大家分享兒時點滴同感受。佢哋同現場觀眾分享時表示,喺香港呢片土地,只要肯努力,就有希望同無限可能。當年嘅香港擁抱臧姑娘,今日嘅香港擁抱在座每一位母親。 而九龍城民政處就會繼續同各地區團體攜手,支持每一位母親,構建更溫暖嘅社區。