@ 
民政團隊8/6繼續召集北區區議員、三會成員及八個關愛隊小隊，喺皇后山邨同山麗苑做咗超過640個探訪，同喺各個主要位置設置三個街站，為居民提供最新用水資訊，以及登記居民求助並作轉介。
兩日來民政團隊合共召集超過130人，聯同房屋署團隊喺皇后山邨及山麗苑合共13座大廈做咗接近1500次探訪，關心居民用水情況。大部分居民都確認水質已大為好轉，亦對團隊上門探訪感到暖心。有居民更加主動邀請團隊入單位，觀察最新嘅水質情況。團隊又會向住戶解釋最新情況同部門嘅跟進工作，例如已經加強大廈濾水設備等，等居民知道同安心。有個別要跟進嘅個案，我哋會同水務署同房屋署嘅師傅再上門檢查跟進，務求將問題解決。
街站方面，民政團隊向街坊發放最新嘅用水資訊，而喺街站服務嘅區議員同義工亦會協助解答居民疑問同就個案做轉介。街站喺呢兩日合共接獲超過800個住戶登記，團隊立即處理同轉介部門跟進。
喺同一時間，北區民政事務專員賴子堅同幾位區議員去到皇后山商場，同商戶、食肆同街市檔嘅員工傾偈，了解佢哋嘅水質同埋生意狀況。
事件發生至今，民政團隊一直以實際行動關心居民生活，好似喺6月1號星期日，北區民政處就動員關愛隊，喺好短時間內開設街站，派發飲用水畀居民，全日總共派發超過7000支飲用水；同一時間，民政處亦協調各部門，安排設置水箱喺皇后山邨同山麗苑各座地下，水箱喺同日傍晚全部投入服務。之後我哋亦時刻留意用水情況，安排適時更換水箱，令居民可以方便攞到安心嘅食水。民政處又聯同區議員同關愛隊義工，喺事件發生頭幾日做咗超過100次探訪同收集個案轉介等等嘅工作，確保住戶得到及時跟進，亦特別留意長者同有需要住戶，以及街市同餐廳嘅情況。
喺完善地區治理制度下，民政團隊聯同區議會、地區三會及關愛隊喺事件發生以來齊心合力，協調好社區嘅人力物力，針對居民需要作出支援，用行動關愛居民。
民政團隊會繼續發揮「民政幫到你」精神，為咗皇后山居民可以安心用水竭盡所能。
