@ 
「關愛隊嘉許計劃」嚟到荃灣啦！
民政及青年事務局局長麥美娟衷心感謝 荃灣區19隊關愛隊隊員、義工及夥伴團體對社區嘅無私奉獻同不懈努力！局長提到荃灣區關愛隊係新界區率先起動成立關愛隊嘅地區，喺過去兩年除咗透過恆常探訪成功與居民建立緊密聯繫，亦已經進行超過20,000次探訪、提供超過10,000次簡單家居或其他支援服務，亦喺地區發生緊急突發事故嘅時候積極支援荃灣民政處嘅應變工作，照顧居民所需。民青局副局長梁宏正、民政總署副署長易志宏同埋荃灣民政專員區家盛都齊齊出席支持，肯定關愛隊對社區嘅貢獻！
多位荃灣關愛隊代表分享服務經驗及感受：
石圍角關愛隊隊長文裕明分享於家訪時曾接觸一個三口之家，家庭關係本來相當緊張。但關愛隊透過長期關顧，鼓勵兩老參加關愛隊嘅社區活動，舒解內心鬱郁，令家庭變得融洽，亦繼續同關愛隊保持良好緊密嘅關係。
馬灣關愛隊隊員鮑小偉就分享佢哋成功凝聚社會資源 嘅經驗，關愛隊會透過街坊收集物資再轉贈有需要嘅居民。例如有位住喺馬灣舊村嘅居民因殘疾而希望得到一部二手電動輪椅，方便到島外覆診，一經呼籲就好快搵到捐贈者，正正係社區關愛互助嘅好例子。
荃灣南關愛隊義工戴亞任分享自己好鍾意寫書法，更用呢個嗜好去服務市民。每逢新春佳節，就會聯同關愛隊一齊為荃灣區街坊寫揮春 ，試過成個團隊喺一場活動中寫咗超過2,000張揮春。
關愛隊夥伴團體中國海外愛心基金會、中國建築國際集團有限公司嘅代表蘇靖然分享，好深刻記得超級颱風「蘇拉」吹襲香港，吹落嘅樹木殘枝堵塞村民出入通道。夥伴團體立刻出動義工隊，喺荃灣民政專員帶領下，配合政府部門，同關愛隊一齊協助清理村內塌樹場地嘅雜物及枯枝落葉，充分發揮政商民嘅合作精神。
關愛隊嘅付出為荃灣區注入正能量，相信荃灣關愛隊會繼續同心協力，為市民貢獻自己嘅力量，同荃灣民政處攜手合作，發揮「荃」心 「荃」意為社區嘅精神！
@