@ 
16/6，荃灣民政專員兼荃灣區議會主席區家盛聯同一眾荃灣區議員 到訪城門谷公園，實地考察公園使用、園藝管理及植物保養情況，並為悉心打理綠化空間 及康樂設施嘅康文署職員打氣 ，感謝佢哋為市民營造優美舒適嘅公園環境 。
負責管理公園嘅職員沿途向各議員講解園內綠化空間嘅分布、植物嘅品種同日常護理工作，以及市民同遊客使用各項設施等資訊 ，加深大家對公園內綠化管理及公眾服務工作嘅了解 。適逢荷花盛開，位於城門谷公園南園嘅荷花池 內粉紅同潔白嘅荷花相映成趣，搭配翠綠色嘅蓮葉 ，吸引眾多攝影愛好者同市民 前來打卡 ，為如此美景留下倩影 。美景背後，有賴康文署園藝管理團隊嘅細心打理 。由植物選種、花卉佈局，到日常保養同修剪，每個細節都展現出專業與用心！
此外，榮獲 2025年香港花卉展覽 東方園圃冠軍嘅荃灣區園圃「江南宅第」 已經喺城門谷公園重置。園圃中嘅石橋、石雕、石檯同拱門都同公園嘅園景融為一體，令人感覺仿佛置身於江南園林之中 ，成為公園其中一個熱門打卡點 。
城門谷公園就好似城市中嘅一片綠洲 ，綠樹成蔭 、花香四溢 。遊人可以享受由植物帶來嘅片刻寧靜 與放鬆 。歡迎市民同家人 隨時到城門谷公園打卡 ，欣賞呢度嘅花草樹木 ，讓身心沉浸喺由大自然帶來嘅愉悅同安逸之中 。
荃灣區議會亦將繼續反映居民就區內休憩設施事宜嘅意見，建造更美好同舒適嘅荃灣社區。
