@ 
為慶祝香港回歸祖國 暨香港特別行政區成立28周年嘅大日子 ，北區民政處喺區內社區會堂/社區中心、回歸紀念園同埋避雨亭等掛上咗國旗、區旗、慶回歸海報同大型橫額，喺北區主要道路仲有燈柱彩旗添 。地區團體亦響應於區內懸掛大型傳統花牌，氣氛十足，同北區巿民一齊歡慶七一。
除此之外，6月26日至7月9日喺北區仲會有兩個大型慶祝活動 同市民大眾共賀回歸，歡迎大家參加 ：
北區微型藝術展
6月26日(四)至7月9日(三)
上午11:00-晚上9:00
上水匯2樓中庭
北區民政事務處、北區區議會、新界社團聯會同新界社團聯會北區地委會合辦以「北區」為主題嘅微型藝術展。展覽有28件精緻作品，就同特區嘅歲數一樣，重點展品包括上水《廖萬石堂》、粉嶺《龍躍頭鄉十年一屆太平清醮神功戲》、沙頭角《沙頭角碼頭暨魚燈舞 表演》同打鼓嶺《麥景陶碉堡》等等，大家可以一次過睇到北區「上粉沙打」4區嘅特色景致。大家記得約埋朋友 嚟參觀展覽，順便遊覽吓北區 、賞建築 、看風光 、嚐美食 ！
北區慶祝香港特別行政區成立28周年綜合匯演
6月28日(六)
下午2:30-5:00
聯和墟社區會堂
由龍山分區委員會、鳳水分區委員會同北區民政事務處合辦嘅「北區慶祝香港特別行政區成立28周年綜合滙演」 ，場內設有遊戲攤位 、即影即有影相booth 同手工藝工作坊 ，節目豐富，憑門票仲可以欣賞歌星 同地區團體表演 助慶，同大家開心賀回歸！喺匯演當日，分區會成員仲會喺區內快閃派雪糕畀街坊，喺炎炎夏日為大家送上一點清涼 。
