@ 
大廈管理知識瞬息萬變，法團、物管公司同業主都需要與時並進，緊貼最新資訊。
東區民政處前日（23/7）舉辦咗「東區大廈管理訓練課程2024」，同參加者分享大廈管理嘅實用資訊，希望大家喺處理大廈管理問題上可以更得心應手。
今次課程邀請咗屋宇署代表講解大廈消防安全嘅法例同維修等範疇資訊，特別仔細講解咗第572章消防安全（建築物）條例，提醒各位要時刻留意大廈嘅防火安全同火警逃生途徑。
點樣申請維修資助，一向都係業主最關注嘅課題之一。市區重建局代表亦同大家講解各項樓宇復修綜合支援計劃，畀有需要業主更加明白申請詳情。
另外，課程上仲有港燈代表講解大廈配電網絡安全，提醒各位定期留意大廈電力設備嘅維修同保養；壓軸仲有律師講解案例分析環節！大家都踴躍發問，獲益良多！
東區區議員同關愛隊隊員亦有參加課程。相信150多位參加者嘅大廈管理實用知識都能有所提升，裝備自己，學以致用，做好大廈管理措施，安居樂業，共建美好東區!
@ 
@