@ 
颱風韋帕星期日(20/7)吹襲本港。九龍城25隊關愛隊做好部署，及早透過社區網絡向居民發放天氣及防災資訊，又巡視小區各個安全隱患黑點，透過民政處向相關部門轉達有關資訊，齊心合力築牢防災安全網。
喺風暴吹襲期間，關愛隊繼續喺安全情況下盡力協助居民，保障社區安全。喺颱風韋帕最接近香港，正值10號颶風信號期間，何文田邨景文樓獨居長者嘅窗戶被強風吹開，風雨打入室內，戶主家人打電話向常樂關愛隊求助。常樂關愛隊馬上動員地區網絡，居於同座嘅義工喺安全情況下好快就去到有關單位幫行動不便嘅長者，令長者鬆一口氣，同時了解長者有冇其他需要。
喺八號熱帶氣旋警告信號除下後，關愛隊第一時間巡邏小區，向民政處報告塌樹、積水、棚架傾斜等情況。又落手落腳將阻礙道路嘅小型雜物同塌樹斷枝移到路旁，務求盡快令道路同行人路暢通，方便政府部門跟進處理。
九龍城區嘅街道迅速恢復正常，全賴關愛隊、區議員同有關部門通力合作，喺極短時間內排查受塌樹影響嘅道路，並移走塌樹及斷枝，將颱風對市民嘅影響減到最低。在此感謝九龍城25隊關愛隊無私嘅奉獻同迅速行動！
@ 