@ 
為締造長者友善嘅居住環境及減輕照顧者嘅壓力，深水埗民政處、深水埗西分區委員會同煤氣公司攜手合作推行「明火煮食智安『深』」計劃」，為深水埗西分區六個大型公共屋邨，共300個長者戶免費安裝智能控制器，長者同照顧者可以透過手機應用程式隨時遙距熄火，避免意外發生。
日前（18/9）民政總署署長杜潔麗、深水埗民政專員王浩宇、深水埗西分區主席麥家榮同煤氣公司營運總裁(香港業務)鄭曉光出席啟動禮，超過100位老友記、區議員同分區委員到場支持，同場仲有場地智能控制器裝置推廣攤位，方便居民掌握最新科技資訊。
啟動禮後，一眾嘉賓仲上門探訪兩戶受惠長者家庭，聽吓老友記分享使用樂齡科技用具煮食嘅喜悅。其中一戶嘅公公婆婆分享話曾經好幾次煲湯唔記得熄火就準備落樓，好彩智能裝置連接咗手機自動提醒，即刻折返屋企熄爐；公公仲好精靈咁話，遙距操作不知幾簡單，老人家都好容易上手，宜家煮飯煲湯都唔駛提心吊膽，可以安心睇電視、落樓運動喇。
感謝煤氣公司免費向240個長者戶提供智能控制器，同附送3年免費維修保養 ；亦感謝西分區麥主席支持額外60個名額，讓更多家庭受惠。
今次活動體現咗政府、地區團體同商界力量嘅良好協作，群策群力為居民營造更安全同具幸福感嘅社區。
