@ 
嗇色園喺前幾日舉辦「嗇色園西醫福澤社群45周年紀慶」紀念碑暨「嗇色園基層及專科醫療顧問團」芳名錄揭幕禮，標誌住嗇色園提供西醫服務45周年。多年以來，嗇色園一直秉持「普濟」精神，關顧區內有需要嘅社群。
黃大仙民政專員Thomas、醫學界翹楚梁智鴻醫生、嗇色園主席黎澤森、嗇色園黃大仙祠監院李耀輝(義覺)道長，聯同一眾嗇色園董事會成員及醫生擔任主禮嘉賓。
嗇色園一直積極配合政府推動基層醫療，今年更成立首個「嗇色園基層及專科醫療顧問團」，由逾百名來自不同界別嘅醫生組成，為嗇色園嘅會員、員工以及家屬喺有需要嘅時候提供專業醫療意見，並會逐步擴展至供嗇色園中央義工及其家屬參與。顧問團醫生亦會就不同健康專題主講講座及接受訪問，共同推廣健康資訊。同時，嗇色園籌備咗一系列以「福澤社群」為主題嘅專題健康講座，向市民傳遞健康資訊及分享紀慶喜悅。
想知道更加多有關於嗇色園嘅資訊？歡迎大家瀏覽以下網址：
https://www2.siksikyuen.org.hk/zh-HK/
