@ 
又嚟到充滿愛與希望嘅聖誕及新年節日！荃灣區節日燈飾籌備委員會已經喺區內裝上璀璨燈飾，為大家帶嚟打卡靚景！
1荃灣公園入口有如繁星閃爍嘅碎燈天幕，兩旁機動花徐徐開合，讓一家大細或同伴漫步靜謐優雅嘅公園時溫馨打卡！
2沙咀道遊樂場同荃灣裁判法院之間馬路中央除咗有愛心熊貓燈飾天幕外，更融入全運會元素，喺布置加上運動圖案，使動感與節日氣氛並存！同旁邊雅麗珊社區中心天橋上嘅燈飾相互輝映!
3西樓角花園彩色拱門猶如一條色彩繽紛嘅時光隧道，今年更新增LED屏幕，有節日氣氛嘅圖案以走馬燈方式展示，帶來嶄新視覺效果！
海濱長廊嘅燦爛燈畫，配上投射於地上嘅光影效果，照亮荃灣海濱！區內天橋亦都紛紛變身 ─ 雅麗珊社區中心通往荃灣大會堂嘅三截天橋、楊屋道天橋、荃灣站對出天橋及荃豐中心行人天橋，全都掛上閃耀燈飾，沿途燈光相伴。
嚟荃灣感受濃濃節日氣氛之餘，一定唔可以錯過一年一度嘅除夕倒數活動，今年「荃城同心•邁向2026」喺12月31日晚上9:00喺沙咀道遊樂場舉行，約定你一齊迎接充滿希望嘅2026年！
