@ 
中西區「海南科技文化探索之旅」 去年11月順利完成，團員回港後整合旅程所見所聞，昨日（21/1）再度聚首一堂，分享大家嘅體驗、難忘經歷同回憶。交流團由中西區民政處同中西區青年網絡合辦。
交流團由20名中西區中學生組成，仲有中西區青年發展及公民教育委員會同中西區青年社區建設委員會5名委員擔任組長，一齊去海南省嘅海口市同文昌市，多角度深入認識海南省嘅發展與文化。
交流團獲海南港澳青年創新創業服務中心同海南省青年聯合會嘅熱情接待，分別安排咗團員與海南大學同海南華僑中學嘅青年交流。大家初次見面已經好投契，互相交流對科技發展、內地升學等議題嘅睇法，傾到完全唔捨得走呀！出發前，我哋嘅團員仲親手製作藍曬明信片，每張明信片都印有中西區特色地標，作為紀念品送畀當地學生，答謝佢哋嘅熱情招待！
交流團嘅行程非常豐富，團員認識到海南省歷史、瓊劇文化藝術、騎樓老街街道規劃和管理，以及探索當地特色椰子產業等。其中最特別嘅體驗一定係到訪文昌航天科普館，除咗可以認識到國家航天事業嘅偉大成就之外，仲有機會嘗試製作水火箭。過程中，團員都要準確掌握氣壓含量及發射角度，先可以令水火箭一飛沖天，大家都話過程唔係想像中咁簡單呀！
為紀念中國人民抗日戰爭暨世界反法西斯戰爭勝利80周年，交流團亦參觀咗毋忘九一八國恥紀念碑、中共瓊崖第一次代表大會舊址等具歷史意義嘅愛國主義教育基地，以銘記歷史、緬懷先烈。
一眾團員都表示今次旅程係一個深刻嘅交流體驗，大大加深咗佢哋對國家科技同文化發展嘅認識。大家都好期待未來可以參加更多交流活動，親身感受祖國嘅壯麗山河及國家發展！
@ 