歲晚清潔大行動啓動日@沙田

臨近歲晚，昨日（23/1）食環署喺沙田街市對出位置舉行歲晚清潔大行動暨啓動日，鼓勵市民積極參與維護社區嘅清潔衞生。

沙田民政專員余懷誠、沙田區議員同增選委員均有出席支持，除咗一齊了解人員使用高速自轉式清洗盤清洗街道嘅好處，仲參與派發宣傳單張同小禮物畀街坊，呼籲大家關注家居清潔同居住環境清潔，養成良好衞生習慣，喺歲晚前齊齊大掃除！

食環署將會喺嚟緊嘅三個星期清潔區內嘅公眾街巿、熟食中心同埋衞生黑點，改善區内嘅環境衞生，為市民營造一個舒適整潔嘅社區，迎接馬年嘅來臨。