@ 
上星期五(6/2)，由香港城市大學主辦、九龍城民政處及東方之珠遊船有限公司全力支持嘅「尋城記行動導賞團——節拍維港尋城記」喺紅磡都市公園及東方之珠號遊船上順利舉行。九龍城民政專員蔣志豪獲邀主禮，與參加者一同創造一段獨特嘅旅程。
香港城市大學推出「尋城記」(City Quest)社區參與計劃，結合教育、旅遊、文化、體育同社區五大元素，凝聚各界，以多元視角發掘同推廣香港特色。呢次活動係「尋城記」其中一個重點活動，亦為之後嘅「影像導賞」手機攝影比賽揭開序幕。
活動當日邀請咗超過400位參加者，包括香港傷健共融網絡代表、中小學生同埋社區團體青少年。大家喺紅磡碼頭一齊上船，由九龍城出發，途經尖沙咀、灣仔等各區，喺維港美景下欣賞樂隊演奏、舞蹈表演、魔術示範等精彩演出。活動為一眾表演者提供咗獨一無二嘅舞台，九龍城民政處安排咗早前參與由九龍城公民教育委員會舉辦嘅「Our Stage Our Voice 青春慶典」學員參與演出，九龍真光中學嘅學生亦獲邀助慶，大家都好珍惜呢個咁難得嘅演出機會，盡情享受喺舞台嘅每一刻，帶動全場氣氛。另外亦有學生即時用畫筆描繪維港嘅美景，走出校園，以嶄新多元嘅視角欣賞香港。呢次活動為青少年提供咗一個難得嘅戶外學習體驗。
展望未來，九龍城民政處會持續與區內持份者合作，豐富社區活動，為市民提供多元嘅體驗，並推動青年發展，協助佢哋發光發熱，建立充滿活力嘅社區。九龍城民政處亦會透過地區深度遊等項目，推廣地區特色，帶動地區經濟。
