@ 
灣仔海濱長廊近日出現咗50支復古街燈，彌漫滿滿懷舊風味！「閃爍燈影耀灣仔」裝置仿照橫跨1890年至1970年代用過嘅八款街燈設計，以點點燈火構建時間迴廊。
復古街燈裝置環繞海濱，一面係維港海景，一面係摩登高樓。景色🪟遠近高低各不同，拎起手機隨便一拍，都可影到獨特效果！
日落時分，閃耀燈光，配上斜陽晚煙，更添唯美浪漫情調，好多攝影發燒友已經嚟左喇，仲唔約埋情人好友，一齊嚟打卡！亮燈儀式「閃爍燈影耀灣仔」早前圓滿舉行，一齊去片睇下當日盛況，欣賞晚照下復古街燈嘅藝術美之餘，亦聽聽灣仔民政專員張雁伶、灣仔區青年社區建設委員會主席莊創業同委員盧子敬嘅介紹！
事實上，除咗一系列屬於「18區日夜都繽紛」嘅活動外，各區舉辦嘅活動可謂全年無休。例如荃灣區，噚日宣布推出消費大抽獎活動，希望幫手推動荃灣區商戶嘅生意。18區民政處亦喺區內設置打卡點，吸引市民同遊客前嚟打卡，欣賞區內特色，例如上文提到近日喺灣仔水上運動及康樂主題區設置「閃爍燈影耀灣仔」復古街燈，畀大家感受昔日老香港嘅情懷；九龍城亦將會喺啟德車站廣場布置新打卡點。
其實，「18區日夜都繽紛」嘅各項活動，推出時已安排喺上半年進行，係考慮到唔少活動喺戶外進行，年中過後嘅颱風季節天氣較熱同不穩，可能會影響市民參與戶外活動嘅意願，所以呢段時間戶外活動數量上嘅調整，實屬正常！
特別值得一提嘅係，每區於上月都舉辦咗唔同嘅七一慶祝活動，成功帶動節慶氛圍。我哋即將迎來75周年國慶，18區亦會舉辦更多一連串慶祝國慶嘅活動，相信可以畀市民一同分享國慶嘅喜悅，將氣氛推往另一高峯。
閃爍燈影耀灣仔@灣仔區 活動詳情如下：
地點：灣仔「水上運動及康樂主題區」海濱站列車前方
日期：即日至2025年1月31日
亮燈時間：每晚6時至10時
想發掘更多灣仔新舊交替嘅獨特面貌，以及一齊推動經濟，一於跟住以下行程遊走灣仔啦！
> 先喺灣仔區內發掘特色餐廳、小店及遊覽灣仔舊區建築
> 再趁黃昏時分，喺灣仔海濱觀賞漫天紅霞
> 同日落後亮燈後嘅50支歷代街燈打卡，了解香港街燈發展史及感受復古情懷
> 最後去灣仔渡輪碼頭搭乘天星小輪，欣賞維港兩岸夜景
