@ 
南區民政處一直積極支持青年發展，除咗支持各地區團體活動，亦組建南區青年團，舉辦咗一系列好玩又豐富嘅暑期活動!!
為響應「青年節@HK」，南區民政處、南區青年團同南區青年發展及公民教育委員會合辦咗「Youth Exploration Hub – 興趣研究所」，畀同學喺暑假又學又玩，發掘更多新興趣。當中包括籃球、桌上遊戲、街頭藝術、樂隊訓練、香水調配同乾花配搭，6大動靜皆宜嘅主題，畀大家喺暑假放鬆不放空，好好充實自己！
同學們學習初有成，當然要把握機會回饋社會，展現苦練後嘅功力！喺社工協助下，一眾同學24/8喺南區舉辦咗社區服務日。由事前設計到活動分工都係由同學們一手包辦！當日，打響頭炮嘅係青年樂隊嘅音樂表演！由專業導師培訓嘅演出果然精彩，聽到街坊拍爛手掌，仲大叫encore添！同場仲有藝術展覽，展出同學喺街頭藝術工作坊嘅作品，仲化身為新晉藝術家，向街坊介紹作品理念，畀更多人認識街頭藝術。
負責香水調配同乾花配搭嘅同學亦冇偷懶！佢哋擔任小導師，教導街坊調配出屬於自己嘅香水同配搭出靚靚嘅花束。唔好睇佢哋年紀輕輕，講解起上嚟一樣有板有眼！
今次社區服務日反應熱烈，未來區內除咗會有更多青年活動畀大家發揮小宇宙外，我哋亦希望青少年會繼續裝備自己，把握不同機遇，喺唔同崗位同領域上貢獻社會！
