@ 
荔景祖堯邨啟敬樓對出麗祖路嘅一條地下食水喉尋日（1/4）早上爆裂，食水湧出路面，水務署隨即到場視察。由於維修工程需要暫停啟敬樓食水供應，為免影響約760戶居民日間用水，經葵青民政處協調後，香港房屋協會先為大廈水箱注滿食水，並發緊急通告通知居民；水務署其後喺晚上約11點停水進行維修，並喺啟謙樓地下放置食水水箱，以備無患。
葵青民政處同時安排祖堯關愛隊通知居民喺停水前儲備足夠食水，葵青區議員同關愛隊亦一直喺現場戒備，協助有需要居民。
葵青民政專員梁乘龍到場視察了解施工情況，有到水務署水箱取水嘅居民向專員表示，收到關愛隊同房協早前嘅通知，已經喺停水前食晚飯同沖涼，取水只為以防萬一，唔擔心維修工程進度。
水務署經過通宵搶修後，已經喺今日（2/4）清晨約5點完成維修，更換損壞水管，趕及喺返工返學高峰期前恢復供水。
葵青民政處與各方快速溝通協調，將今次事件對居民嘅影響減到最低，發揮咗「民政幫到你」嘅關愛精神，令居民能安居樂業
@ 