無分界別 齊做義工@大埔青網x奶龍 坑下莆村義診服務

大埔民政專員陳巧敏8月26日率領近廿名大青義工，聯同大埔區關愛隊林村谷小區同救世軍大埔長者綜合服務中心，一齊入去大埔坑下莆村進行義診。今次鄉郊義診有位好有重量嘅義工加入，大家估吓係邊個？！

就係人氣卡通人物奶龍啊！活潑可愛嘅奶龍負責安排老友記排排坐，耐心等候。然後由大青義工逐一為佢哋度高、磅重、量血壓、度血糖同血氧含量，仲同老友記一齊玩遊戲。老友記同孫仔孫女見到奶龍都笑到見牙唔見眼！

各位義工協助義診時駕輕就熟，有板有眼，將之前所學習嘅照顧護理技巧輕易發揮出嚟，就連老友記都大讚佢哋細心體貼啊！