@ 
律政司 「法治教育領袖培訓計劃 」第二階段 進階課程之參觀執法機關活動，第二團喺8月23號出發！
喺暑假完結之前，有近40位完成咗基礎課程嘅法治教育領袖參加今次嘅活動。同首發團有啲唔同，我哋今次除咗廉政公署，仲參觀咗另一個重要嘅執法機關：香港海關。
香港係全球最廉潔嘅地區之一，而 廉政公署當然功不可沒！今次嘅參觀活動就係一個好難得嘅機會，讓各位學員了解香港嘅反貪之路。除咗香港完善嘅反貪法例，仲有廉政公署專業的執法工作。廉政公署仲喺教育方面著手，同各大專院校合作推行「廉政大使計劃 」 。今次嘅活動就特別邀請咗兩位廉政大使 同學員分享佢哋點樣喺校園推廣同提高反貪知識，學員都深受啟發！
喺廉政公署嘅同事同廉政大使嘅帶領下，我哋參觀咗紀錄廉政公署反貪路上不同里程碑嘅展覽廳、列隊認人室、錄影會面室同埋扣留中心，大家都對廉政公署嘅反貪工作有更深入嘅認識。
第二站，我哋去咗香港海關學院。香港海關嘅同事詳細分享佢哋非常專業嘅訓練，裝備好每一位關員去應付佢哋嘅日常工作，包括緝毒、反走私同埋保護知識產權。唔怪之得香港海關嘅同事個個都咁優秀！香港海關仲有好精靈同好可愛嘅幫手加入他們的團隊 -- 就係海關搜查犬！
海關搜查犬Lady喺活動中為我哋做咗一場非常精彩嘅示範，Lady同埋另一隻海關搜查犬Albert喺學員之間都好高人氣，個個都爭住同佢哋打卡啊！ 香港海關嘅同事之後喺靶場演示槍械同裝備，仲比我哋試下揸(冇彈嘅)真槍 ，真係大開眼界！之後我哋去到參觀專業發展訓練大樓，香港海關嘅同事為我哋展示 X光車輛檢查系統 ，了解佢哋點樣檢查車輛中嘅非法物件。
衷心感謝廉政公署同埋香港海關為我哋法治教育領袖精心安排咁豐富嘅學習活動，讓大家透過參觀執法機關設施，同埋與專業嘅紀律部隊人員互動交流，進一步了解不同執法機關喺維護香港法治嘅重要角色同具體職責。
