@ 
雲南喺抗戰歷史中具備極為重要嘅戰略地位，唔單止係阻擊日軍嘅抗戰前線，亦係中國抗戰嘅大後方。雲南軍民為抗戰勝利付出咗巨大犧牲 ，書寫咗「一寸山河一寸血」嘅悲壯歷史 。
北區青年發展網絡「北極虹」今次由北區民政助理專員陸薇君Jenny帶隊，邀請咗16位北區青年到訪雲南昆明及大理，緬懷先輩戰鬥過嘅地方，牢記今時今日和平生活來之不易 。
同學喺西南聯大舊址（現雲南師範大學）體驗到北大、清華同南開嘅先輩喺戰爭年代堅持辦學嘅艱辛同埋棄筆 從戎嘅決心 。佢哋亦喺雲南解放紀念館了解到雲南起義同解放嘅歷史，並到訪抗戰勝利紀念堂，瞻仰人民英雄紀念碑 ，緬懷前輩嘅巨大犧牲，同時感受當年抗戰勝利後全城歡慶所帶來嘅民族榮光 。
沿住由雲南各族人民修葺嘅抗戰生命線 — 滇緬公路 ，同學嚟到當年「駝峰航線」重要樞紐 — 大理雲南驛機場遺址 。喺呢片充滿英雄氣概嘅土地漫步，除咗可以見到保存完好嘅石碾子、防空洞同埋指揮所外，更可以喺呢座歷史豐碑前，感受跨越時空嘅反法西斯精神 。同學仲去咗周保中將軍紀念館，深入了解白族抗日名將周保中將軍喺白山黑水間14年不屈不撓嘅抗戰歲月，周將軍傳奇一生，亦係中國人民14年抗戰嘅縮影 。
今次喺雲南重走抗戰路線，「虹仔虹女」除咗重溫抗戰年代中國人民嘅巨大犧牲同埋先輩堅持不懈精神之外 ，亦親眼見識到雲南如今高速發展，人民安居樂業 。今次旅程令大家銘記同了解抗戰歷史，感激為國奉獻生命嘅先烈，更加珍惜今日得來不易嘅和平 。
