@ 
由九龍城民政處、九龍城區議會、九龍城區各界慶典委員會同九龍城工商業聯會攜手舉辦嘅「18區日夜都繽紛@龍城美食潑水『泰』繽紛2026」一連兩日（11-12/4）喺九龍城賈炳達道公園正式開鑼啦！有好多精彩活動等住大家，包括泰國特色市集、潑水體驗、泰拳邀請賽、泰式歌舞表演同泰國服裝體驗等。
今日（11/4），「泰繽紛」啟動禮已經順利舉行。民政及青年事務局 Home and Youth Affairs Bureau局長麥美娟、民政總署署長杜潔麗、九龍城民政專員蔣志豪及泰國駐香港總領事Mr. Chaturont CHAIYAKAM皆到場主禮，參與浴佛儀式，並頒發感謝狀予贊助、支持、義工及表演機構。
今晚，一班泰國著名歌手同表演者遠道而來，落力又唱又跳，即刻將全場氣氛推到最高點，市民同遊客都睇得好投入，歡呼聲掌聲不斷！
提提大家，主辦單位喺27/3至12/4推出「消費優惠雙重賞」。如果你已經喺九龍城區指定商戶消費滿港幣200元，獲得港幣10元現金券，記得帶埋現金券嚟「泰繽紛」市集使用啦！
另外，「泰繽紛」聯乘「龍城深度遊」嘅儲印章活動已經開始，大家喺泰繽紛市集消費2次獲得2個泰繽紛印章，再完成「龍城深度遊」嘅打卡任務，就可以嚟攤位換領精美紀念品乙份。
