@ 
由荃灣區青年發展及公民教育委員會、荃灣青年會合辦，荃灣區關愛隊協辦，荃灣民政處全力支持嘅「荃灣區2026兩會精神分享會暨全民國家安全教育日嘉年華」，尋日（11/4）圓滿舉行喇！ 荃灣民政專員區家盛同埋多個政府部門代表都有到場支持，同埋區議員、三會成員、地區領袖以及青年朋友一齊參與呢場盛事，場面熱鬧！
區專員致辭時強調，必須深刻認識「總體國家安全觀」，自覺維護國家主權、安全同埋發展利益，攜手共建穩定繁榮嘅社會，並要了解兩會討論如何引領國家及香港的發展。
今次活動內容包羅萬有！喺兩場兩會精神分享講座入面，港區全國人大代表林至頴同大家分享咗「2026兩會工作重點及主要精神」；而港區全國人大代表兼立法會議員樓家強就主講「把握『十五五』機遇 • 開啟『十五五』新征程」，畀參加者深入領會國家發展方向，把握未來機遇。
現場仲有好多精彩環節，包括莊嚴嘅升旗儀式同充滿活力嘅青少年滙演！大家亦透過國家安全教育展覽同有獎問答遊戲，喺互動中學習國安知識，亦有由警務處、消防處、廉政公署、荃灣區關愛隊等精心設計嘅攤位遊戲，畀市民邊玩邊學，將國民及公民教育融入生活之中。
今次活動成功推廣兩會精神，並以多元化方式加深市民對國家安全嘅關注。展望將來，荃灣民政處會繼續推動地區團體舉辦更多同類活動，鼓勵公眾積極參與，一齊為國家繁榮發展同安全穩定出力！
