@ 
第四屆Y-Dragon正式啟航！超過110位Y-Dragon成員出席咗上星期六(24/8)喺紅磡社區會堂舉辦嘅第四屆「Y-Dragon計劃」啟動禮。九龍城民政專員蔡敏君及九龍城青年發展網絡顧問擔任主禮嘉賓，為新一屆「Y-Dragon計劃」揭開序幕。第三屆嘅Y-Dragon師兄師姐亦協助籌備活動，場面熱鬧。
第四屆「Y-Dragon計劃」為期20個月，將透過義工服務、社區探訪、領袖培訓、機構參觀、職場體驗 及交流團等多元活動，提升參加者嘅個人能力，擴闊生活體驗同視野，鼓勵佢哋關心社區、認識祖國，建立正面價值觀。
啟動禮當日活動內容豐富，邀請咗上屆Y-Dragon嘅師兄師姐分享參與民政處青年活動嘅感受同體會。典禮儀式後，專員同青年發展網絡顧問與現場學生分組玩集體遊戲，以輕鬆方式加深學生對可持續發展目標嘅認識，提升團隊合作能力同溝通技巧，為將來參與義工服務做好準備。
九龍城民政處會繼續同區內學校及青年服務機構三方攜手合作，共同為青年人嘅全人發展奠定良好基礎，培養佢哋成為社會嘅明日領袖。
@