@ 
由九龍城民政處、九龍城區議會、九龍城區各界慶典委員會同九龍城工商業聯會攜手舉辦嘅「18區日夜都繽紛@龍城美食潑水『泰』繽紛2026」已經圓滿結束！
活動得以成功，有賴各合作伙伴嘅積極參與同支持，特別係泰國駐香港總領事館再次邀請多位著名泰國歌手同表演者遠道而來，為大家帶來精彩演出；中國建築工程(香港)有限公司及中華電力有限公司繼續贊助活動，為整個活動提供安全穩定嘅電力系統；仲有市區重建局同九龍樂善堂嘅慷慨贊助，並設置有趣嘅遊戲攤位，令活動豐富多彩；再加上各支持、義工及表演機構嘅鼎力相助，以及九龍城區內各商戶嘅積極參與，先可以為市民同遊客帶嚟一場精彩又充滿歡樂氣氛嘅盛事。
「泰繽紛」聯乘「龍城深度遊」嘅儲印章活動亦順利舉行，大人同小朋友都好高興換到富有龍城特色嘅精美禮品！活動吸引咗市民同遊客了解九龍城區嘅歷史文化特色，到訪「龍城深度遊」嘅特色旅遊資訊景點，展開龍城探索之旅 ，提升區內市民嘅歸屬感。
星期日(12/4)下晝，香港泰國地區聯盟籌辦嘅泰國傳統特色巡遊喺打鼓嶺道休憩花園旁啓動，九龍城民政專員蔣志豪及泰國駐香港總領事Mr Chaturont Chaiyakam到場主禮，欣賞泰國文化表演，並隨同巡遊隊伍由打鼓嶺道出發，途經賈炳達道、龍崗道、城南道等街道，吸引大批市民同旅客參與及沿途觀賞。大家着上泰國傳統服飾，舉起各色幡旗，互相喺面上抹上白色粉末，象徵除厄同祈福，令街道充滿住濃厚嘅泰國新年氣氛 ，感受多元文化嘅魅力。
「泰繽紛」活動前夕，市區重建局亦完成一系列「龍城」區街道美化工程，例如加入泰語路牌、全港首次以藍色防滑鋼砂重鋪車路以象徵敖翔天際等，仲特別邀請咗泰國藝術家，喺城南道嘅增福樓創作巨型微笑大象壁畫，成為熱門打卡地點 ，吸引咗好多市民同遊客專程嚟九龍城感受泰國文化特色！
一連兩日嘅「泰繽紛」活動有近10萬人次參與，成功帶動區內熱鬧氣氛，有商戶表示生意額較平日提升約25-30%，不少餐廳座無虛席，門外大排長龍，市集商戶亦稱今年較去年生意額上升約10%，活力滿滿！
展望未來，九龍城民政處會持續與區內團體合作，為市民提供多元化嘅地區活動，期望提振地區經濟之餘，亦促進種族共融，同大家一齊建設充滿活力同和諧共融嘅九龍城。
